Thursday, November 18, 2010

فى الحب أنا مصدق

هو أنا ميت فى جسد حى
و لا جسدى الحى مات
و ليه عايزنى أجى الدنيا
و أمشى من سكات
و ليه عايزين تخرسوا فيا الكلام
و لا خايفين الكلام يطلع رصاص
يصحى كل الناس
و بدال مايشوفكم دهب
يشوفوا الحقيقة نحاس
بس أنا هصرخ بعلو صوتى
و هاقول
ديه حياتى أنا الى هعشها
و أنا المسئول
أنت مين علشان
تقولى إزاى أعيش الحياة
مش لما تعشها أنت الأول
و أنا مش هقول و أعيد و أزيد
و لا هطول
عندك حياتك أنت حر فيها
و سيب حياة غيرك
و ليه مش قادر
تواجه ضميرك
ربنا قال و الكتاب قال
طب ليه أنت تقول
هو ربنا عملك نبى
و لا خلاك رسول
و ليه أنت الى تحكم
و تقول فين الصح و الغلط فين
ما ربنا إدانا عقل إحنا الإتنين
و أنا هعيش حياتى
بس مش هعيش ميت
لأن لسة فى قلبى الإحساس صاحى
و الحلم من زمان فى حضنى  بيت
و ضميته أنا بجناحى
و قالى قوم أفرد و طير
عالى فوق السحاب
النسر لما يطير فى السما
مابيهموش نبح الكلاب
و الدرس و إتعلمته
و دفعت فيه من حر مالى
أبدا مش رخيص
ده كان التمن غالى
بس مافيش أغلى من الحياة
ده أحنا بنعيش الحياة مرة
و مش ممكن تعود
لو راحت من بين إيدينا
أنا عارف أن الحقيقة
دايما بتبقى مرة
بس هيجرى إيه
لو فتحنا  فى يوم عنينا
و حلمنا فى يوم إتحقق
فى الحب أنا مصدق
مش أى شىء تانى
و بحبك مهما كان
بالساعات و الدقايق و الثوانى
بحبك بكل دقة قلب
بكل نبضة حب
من دمى سكبتهالك
فى كل زاويا و ركن
بكل دمعة حزن
بإيديا مسحتهاك
حبك علمنى
إنه مافيش مستحيل
و أن النهار هيعود
مهما كان الليل طويل
و الوعد الى وعدتهولك
كل يوم أنا بوفيه
و الحلم الى عايشهولك
متسمك أنا لسة بيه
قلى أنت كمان هتتمسك بحلمك
و لا هتسيبهم يقتلوه
هتعيش علشان حبك
و لا هتخليهم بإيدهم يخنقوه
أنا مستنى كلمة منك
بيها أحيا و من غيرها أموت
يا قلبى يكتب أغانى
يا مايبقالوش غير السكوت
  

No comments:

Post a Comment